Difference between revisions of "I Kristceļš"

Latest revision as of 16:15, 18 September 2017

Krystaceļu ejūt kūpeigi, var pīsaturēt pi šaidas korteibas:
1) Krystaceļa dzīsme (dzīd, ejūt nu vīnas nūstošonas leidz ūtrai);
2) V. Mes pīlyudzam Tevi, Kristu, un Tevi slavejam. R. Jo ar sovu krystu pasauli atpērki.
3) Atteiceiga apdūmošona un lyugšona;
4) Tāvs myusu... Esi sveicynota, Marija...
5) V. Kungs, apsažāloj par mums. R. Apsažāloj par mums.

NŪDŪMS
Krystaceļu īdami, apdūmosim un pagū-dynosim myusu Kunga Jezus Kristus cīsšonas,
lyugdami sev grāku pīdūšonu un cytas vajadzeigos žēlesteibas.
Lyugsimēs:
Svētej Kungs, šū sovu tautu, kuras dēļ myusu Pesteitojs Jezus Kristus naatsateice
sevi nūdūt grēcinīku rūkos un uzajimt krysta cīsšonas. Mes Tevi lyudzam, kas
dzeivoj un voldi myužu myužūs.

PYRMO NŪSTOŠONA
Muns lobais Jezu, tīsas prīškā stovi, Grēceigo tauta meklej Tovu novi.
Īnaidā oklā bendes klīdzūt prosa: Tevi kaļt krystā!
Pēc tam jī Tevi, Kungu Dīvu augstū,
Ar osom reikstem nažēleigi šausta.
Tu atdūd sevi ļaunim īnaidnīkim
Par grēcinīkim!

KUNGU JEZU NŪTĪSOJ UZ NOVI
Augstī prīsteri un tautas vacokī nūsprīde Jezu nūnovēt. Jī, sasējuši Jū,
aizvede un nūdeve zemes porvaļdnīkam Pilatam. (Mt 27, 1. 2)

-Kas man doroms ar Jezu? - jautoja Pilats (Mt 27, 22)
-es pi to cylvāka naatrūnu nikaidas vaines. (Lk 23, 4)
Bet vyss ļaužu pyuļs klīdze... Pīkaļ Jū krystā! (Lk 23, 18. 2l)
-Lykuma sorgi Mani napazyna, tautas vadeitoji atkryta nu Manis - soka pravīts. (Jer 2, 8)

Lyugsimēs:
Dīvs, Tu nivīnu naatraidi, bet laipni pīdūd pat vyslelokajim grēcinīkim,
kas gondarej; uzklausi žēleigi myusu pazemeigos lyugšonas un apgais-moj
myusu sirdis, lai mes spātu Tovus lykumus izpiļdeit. Caur Jezu Kristu,
myusu Kungu. Amen.

ŪTRO NŪSTOŠONA
Cik nažēleigi Jezus zaimots tyka, Ērškēžu krūni kad Jam golvā lyka
Un uz Jo placim mete gryutu krystu, Lai Jys tū nastu!
Par myusu vainem Jezum novi lēme.
Pasauļa grākus Jys uz sevi jēme,
Jo vysus aizvest debess svātlaimeibā
Ir Dīva gryba!

KUNGS JEZUS JAM SMOGŪ
KRYSTU UZ PLACIM
Mes vysi maļdejomēs kai vuškas, kotrs raudzejos uz sovu ceļu.
Bet Kungs vysu myusu nataisneibas uzlyka Jam - soka pravīts. (Is 53, 6)
- Myusu grākus Jys aiznese sovā mīsā pi krys-ta, lai mes, grākim myruši,
dzeivotu taisneibai. (1 Pīt 2, 24)
Lyugsimēs:
Kungs Dīvs, īlej myusu sirdīs Svāto Gora žēlesteibu, lai mes varātu ar
nūžālas osorom nūmozgot sovu grāku vaines un nu Tovas lab-vēleibas
sajimt pīdūšonu. Caur Jezu Kristu, myusu Kungu. Amen.

TREŠO NŪSTOŠONA Zam krysta nostas Jezus kreit bez spāka - Jū smogi nūspīž vysu ļaužu grāki. Bet bendes līk Jam tyulen otkon ceļtīs Un toļok dūtīs! Trejs godus Jezus lobu dorūt goja, Ni atpyutas, ni dusas nazynoja, Bet tagad sopu ceļā systs un neivots, Nu vysim atstots!

KUNGS JEZUS PYRMŪ REIZI PAKREIT ZAM KRYSTA
Mes uzskatejom Jū kai par spitaleigu, nu Dīva sasystu un
pazamotu - soka pravīts. Bet Jys myusu porkopumu dēļ ir
īvainots un myusu grāku dēļ ir satrīkts. (Is 53, 4, 5.) - ...
Caur Jo bryucem mes asam dzīdynoti. (Is 53, 5)
Lyugsimēs:
Vysuvarenais Dīvs, mes Tevi lyudzam, lai caur Tova vīnpīdzymušo
Dāla cīsšonu nūpalnim mes tyktu styprynoti, kam daudzos gryuteibos
pītryukst spāka. Mes Tevi lyudzam, kas dzeivoj un voldi myužu myužūs.
Amen.

CATŪRTO NŪSTOŠONA
Pesteitojs sastūp sovu Moti svātū. Kas gon jos sopes vordūs izteikt spātu:
Jos Dāls vyslobais, nataisneigi tīsots, Tūp systs un zaimots!
Ak, sopu Mote! Ļaun ar Tevi raudot
Un krysta ceļu Jezum leidza staigot!
Kod dzeives beigos pagurs myusu kojas,
Ved debess mojos.

KUNGS JEZUS SATEIK SOVU SVĀTŪ MOTI
Tev pošai caur dvēseli zūbyns cauri īs - soka pravīts. (Lk 2, 35)
Kam lai Tevi pīleidzynoju, lai Tevi īprīcynotu... ?
Tovas bādas ir lelas kai jyura. (Lam 2, 13).
Lyugsimēs:
Dīvs, kura cīsšonos pēc Simeona pravītojuma Vysusvātokos
Jaunovas Marijas dvēseli pordyure sopu zūbyns: dori, lai mes,
gūdynojūt jos sopes, īmontotu svēteigūs Tovu cīsšonu augļus.
Mes Tevi lyudzam, kas dzeivoj un voldi myužu myužūs. Amen.

PĪKTO NŪSTOŠONA Kur gon ir tī, kū Jezus dzīdynoja? Kam deve maizi, bādos mīrynoja? Nav vairs nivīna, kas Jū aizstovātu Un paleidzātu! Ak, Dīva Jārs, kas upurēji sevi, Par myusu grākim sevi bendem devi Ļaun, lai ar Tevi smogū krystu nasu, Tev atbolsts asu!

SEIMAŅS CIRENĪTS PALEIDZ
KUNGAM JEZUM NEST KRYSTU
Kad Jū vede, jī sajēme kaidu cylvāku, kas goja nu teiruma,
un uzlyka jam krystu, lai jys tū nastu pēc Jezus. (Lk 23, 26)
- Nagrybu lapnotīs ar kū cytu, kai tikai ar myusu Kunga
Jezus Kristus krystu. (Gal 6, 14) Tim, kas īt pazusšonā -
soka apostols - krysta vords līkās muļkeiba, bet mums,
kas teikam pesteiti, tys ir Dīva spāks. (1 Kor 1, 18)
Lyugsimēs:
Paleidzi mums, Kungs, myusu Dīvs, un sorgoj vīnmār sovā
patvārumā tūs, kas prīcojās par Tova svāto Krysta gūdu.
Caur Jezu Kristu, myusu Kungu. Amen.

SASTO NŪSTOŠONA
Snādz Veronika Jezum drēbi svaigu, Lai nūslauceitu dīviškeigū vaigu.
Par tū Kungs Jezus atstoj drēbē skaidru Sovu attālu.
Kungs, lai es Tevi vysur redzēt spātu,
Īspīd man dvēs'lē sovu vaigu svātū!
Lic man pi Tevis uzticeigi stovēt
Dzeivē un novē!

VERONIKA PASNĀDZ KUNGAM JEZUM SVĪDRU LOKOTU
Mes redzējom Jū - soka pravīts - Jam nabeja nikaida izskota,
ni ari kaida skaistuma, lai mes Jū ar labpatyku uzlyukotu...
Veirs, kam nabeja svešas sopes un kas beja nūryudeits cīsšonos.
(Is 53, 2. 3)
...Jys nese daudzejū grākus un par grēcinīkim lyudzēs. (Is 53, 12) Lyugsimēs:
Vysuvarenais Dīvs, mes Tevi lyudzam, lai, ar svātdareitoju
žēlesteibu īmontojuši leidzeibu Kristum, mes tai nastu sevī
šū Dīva attālu, kai leidz šam bejom spīsti nosot Oduma bārnu zeimi.
Caur Jezu Kristu, myusu Kungu, Amen.

SEPTEITO NŪSTOŠONA
Jau ūtru reizi Jezus kreit zam krysta, Jo ļūti smoga ļaužu grāku nosta.
Bet grēceigs cylvāks steidzās dareit ļaunu Otkon nu jauna!
Uzlyukoj, cylvāk, sovu Pesteitoju;
Jo mīlesteiba dora Jū tik voju!
Žālodams myusus, Jezus mūkas cīte
Pats myusu vītā!

KUNGS JEZUS ŪTRŪ REIZI PAKREIT ZAM KRYSTA
Kungs beja nūlēmis Jū satrīkt ar cīsšonom -soka pravīts. (Is 53, 10)
Cik naizpētejami ir Dīva lāmumi un cik naizdybynojami ir Jo celi! (Rom 11, 33).
Jys nasaudzēja sovu vīneigū Dālu, bet myusu dēļ Jū
atdeve. (Rom 8, 32)

Lyugsimēs:
Pastoveigas grāku nostas nūspīsti, lyudzam Tevi, vysuvarenais Dīvs,
lai mes tyktu atbreivoti caur Tova vīnpīdzymušo Dāla cīsšonom,
kas ar Tevi dzeivoj un volda myužu myužūs. Amen.

OSTOITO NŪSTOŠONA
Mūcekli svātū, kuru nove apdraud,
Sīvītes dažas leidzjyuteibā apraud.
Jom Jezus soka: raudit tik par sovim
Un bārnu grākim.
Lyudzam, o Jezu, svētej vysus bārnus, Sorgoj jūs sovā žēlesteibā svātus:
Ticeibā dzeivā, mīļodami Tevi, Lai jī glob sevi.

KUNGS JEZUS MĪRYNOJ RAUDŪŠOS SĪVĪTES
Naraudit par mani - soka Jezus, - bet gon raudit par sevi un sovim bārnim;
(Lk 23, 28) t. i., par bārnim, kas vairok īmīļoja ļaužu gūdu nakai Dīva gūdu.
(Jņ 12, 43)

Lyugsimēs:
Vysuvarenais Dīvs, mes Tevi lyudzam, lai Tovas žēlesteibas mīrynojums
styprynoj myusus, kas sovu grāku dēļ cīšam peļneitu stropi.
Caur Jezu Kristu, myusu Kungu. Amen.

DEVEITO NŪSTOŠONA
Kreit Jezus otkon, klusu panas mūkas. Tur cīši krystu nūgurušos rūkas,
Jo ar šū krystu teikam atpesteiti Un svātdareiti.
Sūlamēs, Jezu, staigot Tovos pādos
Globtīs pi Tevis vysos dzeives bādos.
Tik lyudzam Tovas žēlesteibas spāku
Ceinā ar grāku.

KUNGS JEZUS TREŠŪ REIZI PAKREIT ZAM KRYSTA
Apdūmojit par tū, kas porcīte nu grēcinīkim tik lelu vojošonu,
lai jyus napagurtu - soka apos-

tols. (Ebr 12, 3) Lyugsimēs:
Dīvs, Tu ar sova vīnpīdzymušo Dāla pacīteibu satrīci ļauno gora lepneibu:
paleidzi mums ar cīnu apdūmot tū, kū Jys par mums lānproteigi izcīte,
lai ari mes pēc Jo parauga vysas gryuteibas mīreigi panastu.
Caur Jezu Kristu, myusu Kungu. Amen.
DASMYTO NŪSTOŠONA
Golgotas kolnā Jezum nūvalk drēbes.
Stov, ļaužu apsmīts, tys, kū pīlyudz debess:
Eršku krūns golvā, mīsu apkloj rātas,
Mirdz Asnis svātais.
Jo kas grib sovu grāku skrondas nūmest Un žēlesteibas tārpā sevi īgērbt,
Ar skaidru sirdi lai jys Jezum sekoj, Jo gūdam dzeivoj.

KUNGAM JEZUM NŪVALK DREBES
Ļaundaru bors ir mani aplencis... jī sadola sovā storpā munas drēbes -
saceits pravītojumā. (Ps 22, 17. 19)
Kristus pats sevi atdeve, lai myusus izpesteitu nu ikvīnas nataisneibas
un sagatavotu sev teiru tautu - soka apostols. (Tit 2, 14) Īsagērbit jaunā

cylvākā, kas pēc Dīva ir radeits. (Ef 4, 24) Lyugsimēs:
Vysuvarenais myužeigais Dīvs, kas lyki Pesteitojam izcīst krysta novi,
lai Jys dūtu ciļvē-cei cyldonu pazemeibas paraugu: mes Tevi lyudzam,
lai, sekodami Jo pacīteibas prīkš-zeimei, mes varātu daleitīs ar
Jū arī augšan-ceļšonos gūdeibā. Caur Jezu Kristu, myusu Kungu.
Amen.

VĪNPADSMYTO NŪSTOŠONA
Cik skaudras sopes Dīva Dāls tod juta,
Kad rūkom, kojom noglas cauri syta!
Par mums Jys cīte mūkas nažēleigas
Aiz mīlesteibas!
Tu, lobais Jezu, sopu dzeļmē grimi, Lai globtu grākūs pagrymušū zemi,
Lai dvēselem reiz austu lelo laime -Byut svātūs saimē!

KUNGU JEZU PĪKAĻ PI KRYSTA
Na ar zaltu voi sudrobu asat atpērkti, bet ar dorgū Jezus Kristus asni -
soka apostols. (1 Pīt 1, 18, 19) Upurāts ir, jo pats tū vēlejos un
naatdareja sovu muti. (Is 53, 7)

Lyugsimēs:
Vysuvarenais myužeigais Dīvs, kas esi syutejis pasaulē sovu
vīnpīdzymušū Dālu, lai ar jo Asni mes tyktu atpesteiti,
Tevi lyudzam, paleidzi mums, lai mes gūdynojūt
Jo cīsšonu nūslāpumu, tyktu pasorgoti nu vysa ļauna
un īmontotu myužeigū olgu debesīs. Caur Jezu Kristu,
myusu Kungu. Amen.

DIVPADSMYTO NŪSTOŠONA
Cylvāki ļauni zaimoj Pesteitoju, Jam nūmērt krystā līk storp laupeitojim.
Lai debess mojos vysim byutu vīta, Jys mūkas cīte.
Žēleigais Jezu, esi tod pi manis,
Kad šytos dzeives atvodas man zvaneis.
Lic man uz lyupom Tovu svātū vordu,
Muns lobais Jezus!

KUNGS JEZUS MERST PI KRYSTA
Nu sastos leidz deveitai stundei - soka Sv. Roksti -
tymsa apkloja vysu zemi... un zeme nūdrebēja. (Mt 27, 45. 51)
Kristus nūmyra par myusu grākim. (1 Kor 15, 3) Tī, kas sorgoja Jezu,
ļūti nūsabeida un saceja: Patīši, Jys beja Dīva Dāls. (Mt 27, 54)

Lyugsimēs:
Kungs Jezu Kristu, dzeivo Dīva Dāls, kurs pasauļa pesteišonas
dēļ ļovi sevi krystā pīkaļt, izlejūt sovu vysudorgū Asni
myusu grāku atlaisšonai: ļaun mums pēc noves prīceigim īīt
Tovā vaļsteibā. Mes Tevi lyudzam, kas dzeivoj un voldi myužu myužūs.
Amen.

TREJSPADSMITO NŪSTOŠONA
Dus Jezus mīsa Dīva Motes klēpī. Ļaun mums, o Mote, raudot leidz ar
Tevi Par Tovu Dālu, myusu dēļ kas cīte Un goja novē.
Kad mums byus jomērst, naatstoj, ak Mote,
Tu, sorgotoja, esi mums tod klotu!
Pi sova Dāla ved myusus vysus maigi
Redzēt Jo vaigu.

KUNGA JEZUS MĪSU NŪJAM NU KRYSTA
Pi Jezus krysta stovēja Jo Mote (Jņ 19, 25)... Un raudos par Jū,
kai mādz raudot pi pyrmdzymto noves - soka pravīts (Zah 12, 10).
Lyugsimēs:
Vysuvarenais un žāļsirdeigais Dīvs, kas
grēcinīkim patvārumu un paleidzeibu esi licis meklēt
Vysusvātokajā Jaunovā Marijā: mes ar Jos aizbiļdeibu lyudzam,
parodi mums, Kungs, sovu žāļsirdeibu un atbreivoj myusus nu grāku vainem.
Caur Jezu Kristu, myusu Kungu. Amen.

ČETRUPADSMYTO NŪSTOŠONA
Līk svātū Mīsu klinšu kopā klusā,
Leidz trešai dīnai Jezum tur byus dusa.
Tod Jys, kai saule myrdzūt, gūdā ceļsīs,
Nu kopa izīs.
Tai myusu gaitas kopa molā beigsīs, Por soltū mīsu smiļšu saga klosīs,
Bet tīsas dīnā taisneigūs Dīvs pīceļs Un gūdā īceļs.

KUNGA JEZUS MĪSU ĪLĪK KOPĀ
Taisneigū dvēseles ir Dīva rūkā - soka Sv. Roksti (Gudr 3, 1).
Atnoks stunde, kad vysi, kas guļ kopūs, dzērdēs Dīva Dāla bolsu.
Un tī, kas lobu dareja, pīsaceļs uz dzeivi; bet tī, kas dareja ļaunu -
lai stotūs tīsas prīškā (Jņ 5, 28. 29).

Lyugsimēs:
Dīvs, Tu, grybādams atbreivot myusus nu
ļauno gora varas, esi vēlējīs, lai Tovs Dāls uzajimtu krysta cīsšonas;
ļaun mums, Tovim kolpim, sasnēgt augšanceļšonos žēlesteibu.
Caur Jezu Kristu, myusu Kungu. Amen.

BEIGOS Tu, lobais Jezu, novi uzvarēji, Ar sovu krystu myusus atpesteji. Tev pateiceibā dūdam sevi vysu: Dvēseli, mīsu. Mes Tovā gaismā dzeives ceļu īsim, Ar krysta zeimi ļaunu uzvarēsim, Jo svātais krysts vad debess Tāva mojos -Myužeigā dzeivē.

Lyugsimēs: Mes Tevi lyudzam, Kungs, lai nok bogoteiga svēteiba Tovim ļaudim, kas dīvbejeigi ir apdūmojuši Tova Dāla cīsšonas un novi; lai jim teik atlaisti grāki, dūts īprīcynojums, styprynota ticeiba un nūdrūšynota myužeigo pesteišona. Caur Jezu Kristu, myusu Kungu. Amen.