Lyugšona par prīsterim

Vysulobais Jezu, Tu ar sovu dīviškū Sirdi vīn-mār jyuti leidza
naboga ciļvēcei, kas īt pa šos zemes ērškainim celim, un ryupejīs
par tū, lai jei tyktu vērzeita uz myužeigū dzeivi. Mes Tevi lyudzam,
Kungs, pasaver uz sovu Bazneicu un syuti jai dīvbejeigus un svātus
prīsterus. Tu pazeisti kotra sirdi, todēļ izvēlej sev uztycamus strodnīkus,
lai myusu tautā jī piļdeitu cyldonū patīseibas un mīlesteibas misiju. Dori,
lai jī pazeitu dīviško paaicynojuma bolsu. Styprynoj jūs grybu, lai jūs
naporvar ciļvēciskos vojeibas. Moci jūs pacīteigi nest krystu, kū Tu,
dīviškais Pesteitoj, pats uzlic uz jū placim prīstereibas sakramentā.

Īdves vacokim porlīceibu, ka bārni, kas aizīt prīstereibas ceļu, ir
vysleloko un vysskaistoko dovona Dīvam. Mes Tevi lyudzam, Kungs, syuti
sovim prīsterim Svāto Gora dovonas, lai jī spātu paleidzēt cylvākim
dzeivē un noves stuņdē. Seviški, lai jī mīļoj mozūs un panycynotūs,
kas cīš un ir nu cytim aizmērsti; lai jī ir patīseibas syutni Tovā
Bazneicā, pylni dzeivas ticeibas; lai ir mīlesteibas eņgeli, kas atsateic
nu gimines laimes un sevi piļneigi zīdoj augstokam, myužeigam mērkam;
lai jī ir upura nesēji, kas gondora par sovu broļu grākim; lai ir padūma
un styprynojuma nesēji cylvākim tykumu un pīnokumu ceļā.
Kungs, kas moceji un vadeji sovus apostolus, svētej tagad prīsterus jū
dorbā, lai jūs pyulem vysod ītu leidza Tova žēlesteiba.